रणबीर सिंह दहिया की रागनी – अन्तहीन संसार

अन्तहीन संसार
अन्तहीन संसार का अन्त कहैं कदे नहीं आवैगा।।
संसार रूकता नहीं कितै यो आगै बढ़ता जावैगा।।

1

विज्ञान नई खोज करै मानवता नै सुख पहोंचावै
विवेक माणस का फेर इनै सही दिशा मैं ले ज्यावै
सत्य खोज निरन्तर चलावै झूठ नै हमेश्या ढावैगा।।
संसार रूकता नहीं कितै यो आगै बढ़ता जावैगा।।

2

पदार्थ हमेश्या गति शील हो इसका गुण बताया यो
नष्ट नहीं होवै कदे बी बदलता आकार दिखाया यो
साइंस नै पाठ पढ़ाया यो पदारथ ना समाप्त हो पावैगा।।
संसार रूकता नहीं कितै यो आगै बढ़ता जावैगा।।

3

खोज हमेश्या जारी रहती न्यों विज्ञान हमनै बतावै
हम बुद्धि गेल्यां काम करां भावां मैं बैहने तै बचावै
सिद्ध हुया उसनै अपणावै बाकी पै सवाल उठावैगा।।
संसार रूकता नहीं कितै यो आगै बढ़ता जावैगा।।

4

अज्ञानी मां बीमार बालक नै तांत्रिक धोरै ले ज्यावैगी
ज्ञानी मां डॉक्टर तै दिखाकै बालक की दवाई ल्यावैगी
भावां मैं बैह ज्यावैगी तो बालक रणबीर ना बच पावैगा।।
संसार रूकता नहीं कितै यो आगै बढ़ता जावैगा।।