ओमसिंह अशफ़ाक की दो कविताएं
कर्ज़े नीच्चै सांस फूलगी !
म्हारी कर्ज़े नीच्चै सांस फूलगी,
तू करता फिरै किल्लौ़ल रै बाबा !
म्हारे लित्तर गेल्यांई तल़वे घिसगे,
तू उड़न खटोल्ले में डौल रै बाबा !
दिके लाल रेत में छाल्ले पड़गे,
ना असर करै “बरनोल” रै बाबा !
हम एमएसपी की रहे बाट देखते,
तू करता रह्या टाल़-मटौल़ रै बाबा !
हम झूठ्ठे वादे कद चाहवां थे,
देत्ता नापतौल कै बोल रै बाबा !
सात सौ माणस नै जान खपादी,
ये वेल्लड़ करैं मखौल रै बाबा !
ये हरे जख़म पै नूंण छिड़क दें,
म्हारे दिल में उठ्ठैं हौल रै बाबा !
हम अमन के रस्ते चाल्लण आल़े,
नातै कर देन्दे छितरौल़ रै बाबा !
सब कुछ सहकै भी बाट देखरे,
कद बजै जीत का ढो़ल रे बाबा !
————————
नहीं मिलता कोई काम रे बंदे!
एक की करनी सब नै भरनी, देश होया बिरान रे बंदे !
हठधर्मी या पड़ै छोड़णी, न्यूं बणै नहीं कुछ काम रे बंदे !
फौज़ फिरै बे-रुजगारां की, नहीं मिलता कोई काम रे बंदे !
बागडोर तो तेरे हाथ में, ये झूठा नहीं इल्जाम रे बंदे !
बड़े चाव तै सौंपी थी गद्दी, सब बिखर गए अरमान रे बंदे !
एक दिन तो सच आवै सामणै, फिर टूटेगा अभिमान रे बंदे !
महंगाई ने कमर तोड़ दी, हुए घणे परेशान रे बंदे !
जीतेजी न्यूं मरणा होग्या, फंसी आफ़त में जान रे बंदे !
