रणबीर दहिया की रागनी

राजघाट पै थारे कातिल हिम्माती आज फूल चढ़ाते पाये।।

देखे जब ये पाखंडी टीवी पै तो मेरी आंख्यां मैं आंसू आये।।

1

नाथू गोडसे नै चला गोली गांधी बापू का कत्ल करया

आरएसएस का मानस बताया धर्मान्धता तैं पूरा भरया

*थारी मौत की खबर सुणकै पूरे हिंदुस्तान मैं मातम छाये।।*

देखे जब ये पाखंडी टीवी पै तो मेरी आंख्यां मैं आंसू आये।।

2

न्यारे न्यारे विचारों वाले सबकी करी अगवाई बापू

देश की आजादी खातर थामनै अलख जगाई बापू

*असहयोग आंदोलन के चलते अंग्रेज बहोत घणे घबराये।।*

देखे जब ये पाखंडी टीवी पै तो मेरी आंख्यां मैं आंसू आये।।

3

आज देखले आकै वेहे हिंदुस्तान मैं नफरत फैलारे

हिन्दू मुस्लिम सिख ईसाई थारा जन्म दिन आज मनारे

*अंध विश्वास के सरकार नै सारे देश मैं प्रचार करवाये।।*

देखे जब ये पाखंडी टीवी पै तो मेरी आंख्यां मैं आंसू आये।।

इनके पाखण्ड देख देख कै थारी याद बहोत आवै सै

थारे सपन्यां आले भारत कै रमलू ताला लाया चाहवै सै

*रणबीर बरोने आले नै थारी याद मैं टूटे फूटे छंद बनाये।।*

देखे जब ये पाखंडी टीवी पै तो मेरी आंख्यां मैं आंसू आये।।