रागनी
इस होली का मतलब आज खोल समझाऊँ मैं
डॉ रणबीर सिंह दहिया
होली बारे एक रचना
इस होली का मतलब आज खोल समझाऊँ मैं।।
चार हर्फ़ों तैं बणै HOLI पूरी बात बताऊँ मैं ।।
1
एच तैं मतलब हेट इसका घृणा अर्थ बताया
औ तैं मतलब आउट पूरा अर्थ बाहर दिखाया
घृणा भीतर जितनी उनै बाहर फेंकना चाहूँ मैं।।
चार हर्फ़ों तैं बणै HOLI पूरी बात बताऊँ मैं ।।
2
एल तैं मतलब लव पूरा अर्थ प्रेम कहवैं सैं
आई तैं मतलब इन अर्थ इसका भीतर लहवैं सैं
नफरत तज प्यार करो असली अर्थ सिखाऊं मैं ।।
चार हर्फ़ों तैं बणै HOLI पूरी बात बताऊँ मैं ।।
3
आया अक नहीं आया मतलब समझ मैं म्हारै
होली का त्यौहार रंगां का दखे प्यार बखेरता सारै
नफरत त्यागो प्यार करो सबतै बात सुनाऊं मैं।।
चार हर्फ़ों तैं बणै HOLI पूरी बात बताऊँ मैं ।।
4
होली अर फाग का सारे कै त्यौहार मनाया जा
होसै जीत अच्छाई की बुराई हारै न्यों समझाया जा
जीतै आज बुराई क्यों रणबीर समझ नहीं पाऊँ मैं ।।
चार हर्फ़ों तैं बणै HOLI पूरी बात बताऊँ मैं।।
